Main Barson Se Jheel Ka Gehra Pani

Main Barson Se Jheel Ka Gehra Pani, 

Tum Barson Se Manzil Se Anjan Musafir, 

Chalty Chalty Thak Kar Yunhi, 

Ik Din Tum Mery Sahil Par Aa Bethy, 

Tum Ne Apna Dil Behlany Ko, 

Mujh Mein Ek Kankar Phainka, 

Tab Se Ab Tak, 

Meri Lehron Mein Halchal Hai, 

Tum Ne Mujh Se Mera Jo Thehrao Cheena, 

Wapas Kar Do, 

Ya Phir.... 

Mujh Ko Apni Manzil Jan K, 

Mujh Mein Utro, 

Phir Mujh Mein Youn Gum Ho Jao, 

Jaisy Jheel K Pani Mein, 

Girti Boondein Barish Ki.